selbstsicher betritt ich de coop und laufe dur de lade dure als heti mis ziel vor auge
doch noch einige meter schint mer öppis mini ufmerksamkeit z raube
ich stoh vor em süessigkeiteregal und luege mier d ahgebot dure
ghöre niemerte schnurre, d chopfhörer dröhnen durch mini ohre
überleg mer was i ha wölle, doch unbemerkt hani de fade verlore
hetts da oder da oder da sölle si frog i mi churz druf schissi ufs entscheide
will s nodenke vermeide
sus wird mer s chaufe nämlich no vergleide
so rüehri au nu alles was ahsatzwis em ursprüngliche ahsatz entspricht mit netto gwicht in wage und setzte mini reis fort
ich befinde mich amne guete ort zum reise, mich umgebet unzähligi speise, vu kornbäll für blaumeise, zu sache vu dene i denk dass i sie bruche
i chauf alles, usser da woni sueche
fuess um fuess leitet mi dur de dschungel vu ahgebot wo mer segen dass i eze zueschloh muess
lüchtend grelli schilder vu rot und gäl wisen mier de weg
de gedanke dass s einzige isch für da i do herecho bi brot und mähl isch erschint mer schräg
denn ohni s chaufe erfahri en verlust und wer will scho de frust in sich träge denki mier
denn im richtum lit de sege, das segens dier
so hüllt und füllt sich de berg i mim ichaufswage schritt für schritt
jede tritt e neui versuechig und mit jedem manifestiert sich in mier: konsument isch des mensche beruefig
so bini scho fast bide kasse, gsehn mannigfaltig viel vu minre rasse genau döte e reihe bildend, ihri neue eigetümer in spe scho mit de auge vertilgend
binden sich mit schnüer us kassezettel anenand und warten gspannt uf s nöchste geschenk
wo me denn doch nu in chaste hengt und nume useholt wenn de schenker uf bsuech isch
und wenns öppis zum stelle isch, holt mes usem chaste und stellts uf de tisch
hinter und vor mine auge spielt e tragödie in 2020 akt
es schiff goht unter uf stürmische see, de anker isch kappt
die wüetende welle schlöhn um sich ume während d wiehnachtszit chunnt und ein jeder krimskrams in gschenkpapier verpackt
am endi blibt nüt usser die nackti kahli see
und wenn du ihre welle luschisch ghörsch sie flüstere
„meh, meh“
i weiss, es git so vieles wo me ha chönnt
und was isch scho debi, wenn me sich ab und zue öppis gönnt
s git ei sach wo die wenigste mensche verstöhnd
jede will öppis, zumeist meh als nu ei sach
drum mach i da was i mach und du das was du machsch
wenn du lachsch heissts nicht dassi au lache und wenn ich gränne tuesch dus mir jo au nöd nochemache
bedürfnis sin so individuell, doch sehnen sich dini spiegelneurone paralell z handle
doch versuech mol de impuls in e frog z verwandle
wa wotsch?